Raza Musani 
کیف : روسی فوج یوکرین کے دارالحکومت کیف میں داخل ہوگئی جہاں گلیوں میں لڑائی کا آغاز ہو گیا ہے۔ شہر پر کئی سمتوں سے حملہ کیا گیا ہے کیف کے مرکز سے کچھ دور سے توپوں کے گرجنے کی آوازیں واضح طور پر سنائی دے رہی ہیں۔ شہریوں کو گھروں میں رہنے کی ہدایت کی گئی ہے۔ یوکرین کی مسلح افواج کا کہنا تھا کہ اس کے فوجیوں نے بہت سے روسیوں کو نشانہ بنایا ہے اور انھیں یوکرین کے کسی بھی شہر پر قبضے سے روک دیا ہے۔ جبکہ دارالحکومت کیف کی مرکزی ایونیو پر بھی روسی حملے کو پسپا کر دیا گیا ہے۔ یوکرینی وزارتِ دفاع کی جانب سے روس کے 80 ٹینک، 17 ہیلی کاپٹرز اور 516 بکتر بند گاڑیاں تباہ کرنے کا دعویٰ بھی سامنے آیا ہے۔ روسی وزارت دفاع کا کہنا ہے کہ اس کی افواج بغیر کسی مزاحمت کا سامنا کیے یوکرین کے شہر ملیتوپول میں داخل ہوگئی ہے۔ یوکرین کے صدر ولودومیر زیلنسکی کا کہنا ہے کہ روسی فوج آج رات کیف پر قبضے کی کوشش کرے گی۔ ہم کیف کو نہیں کھو سکتے، آزادی کے لیے آخری وقت تک لڑیں گے۔
