Raza Musani 
انقرہ: ترکیہ نے ایران جنگ ختم کرانے کیلئے سفارتی کوششیں تیز کردی ہیں۔ ترک وزیرخارجہ ہاکان فیدان نے ایران سمیت متعلقہ ممالک کے حکام سے ٹیلی فونک رابطے کئے ہیں۔ ترک سفارتی ذرائع کے مطابق ہاکان فیدان نے ایرانی ہم منصب عباس عراقچی، مصر کے وزیر خارجہ بدر عبدالعاطی، یورپی یونین کی خارجہ پالیسی سربراہ کاجا کیلس اور امریکا کے حکام سے علیحدہ علیحدہ ٹیلیفونک رابطے کیے۔ ان رابطوں میں جنگ کے خاتمے کے لیے ممکنہ اقدامات اور سفارتی راستوں پر تبادلہ خیال کیا گیا۔ ذرائع کا کہنا ہے کہ بات چیت کے دوران خطے میں بڑھتی ہوئی کشیدگی کو کم کرنے اور صورتحال کو مزید بگڑنے سے روکنے پر زور دیا گیا۔ تاہم ان مذاکرات کی تفصیلات جاری نہیں کی گئیں اور نہ ہی کسی حتمی پیش رفت کا اعلان سامنے آیا ہے۔ ماہرین کے مطابق ترکیہ اس معاملے میں اہم ثالثی کردار ادا کرنے کی کوشش کر رہا ہے تاکہ خطے میں بڑے پیمانے پر تصادم کو روکا جا سکے۔
