امریکا اقتصادی دباؤ کے ذریعے کچھ حاصل نہیں کر سکے گا، ایرانی صدر

تہران : ایرانی صدر مسعود پزشکیان نے کہا ہے کہ امریکا اقتصادی دباؤ کے ذریعے کچھ بھی حاصل نہیں کر سکے گا اور ایران اپنی مضبوط پوزیشن پر قائم رہے گا۔ انہوں نے اقتصادی امور پر اجلاس میں کہا کہ حکومت کے اقتصادی شعبوں نے اس دباؤ سے نمٹنے کے لیے ضروری اقدامات پہلے ہی کر لیے ہیں۔ انہوں نے زور دیا کہ امریکہ اقتصادی دباؤ کے ذریعے اپنے مقاصد حاصل نہیں کر سکے گا۔ جس طرح امریکہ جنگ کے دوران بھی کچھ حاصل نہیں کر سکا۔ پزشکیان نے کہا کہ حکومت کی پالیسی باہمی رابطے اور مذاکرات کے ذریعے مفاہمت پیدا کرنا اور مسائل حل کرنا ہے، تاہم اقتصادی دباؤ کے مقابلے میں ایران اپنی مضبوط پوزیشن برقرار رکھے گا۔ انہوں نے کہا کہ ایران اب تک جس طرح اقتصادی دباؤ کے سامنے ڈٹا رہا ہے، اسی طرح آئندہ بھی ثابت قدم رہے گا۔ صدر نے حکومتی اور نجی شعبے کے ان اداروں کا بھی شکریہ ادا کیا جنہوں نے تمام مشکلات اور سخت حالات کے باوجود اپنی کوششیں جاری رکھیں، عوام کی بنیادی ضروریات پوری کیں اور مارکیٹ میں استحکام برقرار رکھنے کے لیے ’’اقتصادی جہاد‘‘ کے جذبے کے ساتھ کام کیا۔