امریکی کانگریس نے ترکیہ کو ایف 16 طیاروں کی فراہمی سویڈن اور فن لینڈ کی نیٹو میں شمولیت سے مشروط کردی

واشنگٹن : امریکی کانگریس نے ترکیہ کو ایف سولہ طیاروں کی فراہمی میں نئی رکاوٹ کھڑی کردی۔ 29 ڈیموکریٹک اور ریپبلکن سینیٹرز نے ترکیہ کو ایف سولہ کی فراہمی پرصدر جو بائیڈن کو خط لکھ دیا۔ سینیٹرز نے لکھا کہ کانگریس ترکیہ کو ایف سولہ لڑاکا طیاروں کی 20 ارب ڈالر کی فروخت کی حمایت اس وقت تک نہیں کر سکتی جب تک کہ انقرہ سویڈن اور فن لینڈ کی نیٹو میں شمولیت پر رضامند نہیں ہو جاتا۔ جس وقت ترکیہ نے نیٹو کے الحاق کے پروٹوکول کی توثیق کر دی کانگریس طیاروں کی فروخت پر غور کر سکتی ہے۔ تاہم ایسا کرنے میں ناکامی سے اس زیر التوا فروخت پر سوالات اٹھ جائیں گے۔ یہ پہلا موقع ہے جب کانگریس نے انقرہ کو ایف سولہ طیاروں کی فروخت کو سویڈن اور فن لینڈ کے نیٹو کے ساتھ الحاق کے ساتھ جوڑ دیا ہے۔