Raza Musani 
واشنگٹن : امریکا نے غزہ میں جنگ بندی کیلئے نئی تجاویز کا مسودہ تیار کرنا شروع کردیا۔ اسرائیلی سرکاری نشریاتی ادارے کان نے کہاہے کہ امریکا غزہ میں جنگ بندی کیلئے جلد ہی ایک نئی تجویز پیش کرے گا۔ جس کا مسودہ تیار کیا جارہا ہے اس مسودے کو تل ابیب اور ثالثوں کے سامنے پیش کیا جائے گا۔ کان کے مطابق نئی تجاویز کی تیاری کے باوجود امریکی حکام فلسطینی دھڑوں کے ساتھ یرغمالیوں کے تبادلے کے معاہدے تک پہنچنے کے لیے پرامید نہیں ہیں۔ امریکی حکام نئی تجویز کو آخری موقع قرار دے رہے ہیں۔ ایک امریکی عہدیدار نے اسرائیلی ادارے کو بتایا کہ امریکی تجویز میں تمام متنازعہ نکات شامل ہیں۔ جن میں سب سے اہم غزہ کی پٹی اور مصر کے درمیان فلاڈیلفی کوریڈور بھی شامل ہے۔ ادھر امریکی سی آئی اے کے سربراہ ولیم برنز نے کہا ہے بہت جلد امریکہ کی طرف سے زیادہ تفصیلی تجاویز محض اگلے چند دنوں میں سامنے آنے والی ہیں۔ انہوں نے کہا کہ مجوزہ معاہدے کا فارمولہ اور متن طے کرنا مشکل مرحلہ ہے کیونکہ دونوں فریقوں کے لیے اسے قبول کرنا آسان نہیں ہے۔
