لبنان کی مکمل آزادی تک اسلحے پر ریاستی اجارہ داری کی بات بےمعنی ہے، سربراہ حزب اللہ

بیروت : حزب اللہ کے سربراہ شیخ نعیم قاسم نے ایک بار پھر تحریک مزاحمت کے غیر مسلح ہونے کیلئے دباؤ کو سختی سے مسترد کر دیا ہے۔
شیخ نعیم قاسم نے کہا کہ جب تک لبنان کی سرزمین مکمل طور پر آزاد نہیں ہوتی، اسلحے پر ریاستی اجارہ داری کی بات بے معنی ہے۔ شیخ نعیم قاسم نے اسرائیل پر جنگ بندی کی بار بار خلاف ورزیوں کا الزام عائد کرتے ہوئے کسی بھی بیرونی مداخلت کو مسترد کر دیا۔ شیخ نعیم قاسم نے امریکہ کی عالمی مداخلت کے خلاف بھرپور مزاحمتی تحریک کی اپیل کرتے ہوئے کہا ہے کہ اب امریکی غلبے کو روکنے کا وقت آ گیا ہے۔ انہوں نے کہا ہے امریکی صدر ڈونلڈ ٹرمپ جمہوری نظام، مذہبی آزادیوں اور قومی خودمختاری کو دبانے کی کوشش کر رہے ہیں۔ ایک لالچی ذہن طاقت کے بل پر قوموں اور عوام کے حقوق پامال کرنا چاہتا ہے۔