فلسطین کا استحکام ہی پورے مشرقِ وسطیٰ کے استحکام کی بنیاد ہے، خلیل الحیہ

دوحہ : حماس کے نئے سربراہ خلیل الحیہ نے کہا ہے کہ فلسطین کا استحکام ہی پورے مشرقِ وسطیٰ کے استحکام کی بنیاد ہے۔ انہوں نے غزہ کے عوام کے تحفظ اور جنگ بندی کے معاہدے پر عمل درآمد کے لیے عالمی دباؤ کا مطالبہ کیا۔ حماس کے سربراہ مقرر ہونے کے بعد اپنے پہلے بیان میں خلیل الحیہ نے کہا کہ اگر غزہ کے عوام کا تحفظ یقینی نہ بنایا گیا تو عالمی انصاف کے تمام دعوے بے معنی ہو جائیں گے۔ خلیل الحیہ نے غزہ میں جاری جنگ کو روکنے کے لیے مصر، قطر اور ترکیہ کی ثالثی کی کوششوں کو سراہا۔ انہوں نے کہا کہ یہ ممالک خونریزی روکنے کے لیے مسلسل سفارتی کوششیں کر رہے ہیں۔ حماس رہنما نے مذاکرات کی سرپرستی کرنے والے ممالک سے مطالبہ کیا کہ وہ اسرائیل پر معاہدے پر عملدرآمد کے لیے حقیقی دباؤ ڈالیں۔ انہوں نے زور دیا کہ طے شدہ نکات پر مکمل عمل درآمد ہی جنگ کے خاتمے کی راہ ہموار کر سکتا ہے۔