ہندوستان میں مذہبی آزادی کی صورتحال تشویشناک ہے، امریکا

واشنگٹن: امریکا نے ہندوستان میں مذہبی آزادی کی صورتحال کو تشویشناک قرار دیتے ہوئے مودی سرکار سے اقلیتوں پر حملوں کی مذمت کا مطالبہ کردیا۔ امریکی وزیرخارجہ انٹونی بلنکن نے محکمہ خارجہ کی مذہبی آزادیوں سے متعلق سالانہ رپورٹ جاری کردی جس میں ہندو توا عناصر کی قیادت میں مسلمانوں, عیسائیوں, دلتوں اور سکھوں سمیت مذہبی اقلیتوں کے خلاف حملوں کی تفصیلات شامل ہیں۔ یہ رپورٹ ہندوستانی وزیر اعظم نریندر مودی کے دورہ واشنگٹن سے ایک ماہ قبل جاری ہوئی ہے۔ ایک سینئر امریکی اہلکار نے بتایا کہ وہ ہندوستان میں مذہبی تشدد کے تسلسل سے مایوس ہیں۔ ہم ہندوستان پر مسلسل دباؤ ڈال رہے ہیں کہ وہ مذہبی تشدد کی مذمت کریں اورمذہبی اقلیتوں کے خلاف غیر انسانی بیان بازی کرنے والے عناصر کو جوابدہ ٹھہرائیں۔ انہوں نے کہا کہ امریکا سول سوسائٹی کے ساتھیوں اورصحافیوں کے ساتھ مل کر کام کرتا رہے گا۔ جو زیادتیوں کو دستاویز کرنے کے لیے ہر روز کام کر رہے ہیں۔ امریکا اپنے ہم منصبوں سے مسائل کو حل کرنے کیلئے براہ راست بات چیت کرے گا۔