Raza Musani 
واشنگٹن: پاکستان کی صورتحال پر امریکا کے 60 اراکین کانگریس نے امریکی وزیر خارجہ انٹونی بلنکن کو خط لکھ دیا۔اراکین کانگریس کے خط میں پاکستان میں وزیر خارجہ انٹونی بلنکن پر جمہوری اقدار اور انسانی حقوق کا احترام یقینی بنانے کیلئے دباؤ ڈالنے کامطالبہ کیا گیا ہےاور اس سلسلے میں سفارتی اختیارات کو بروئے کارلانے پرزور دیا گیا ہے۔ خط میں کہا گیا ہے کہ سیاسی مخالفین کے خلاف کریک ڈاؤن پر اظہار تشویش ہے۔خط کے متن میں حکومت مخالف افراد کی گرفتاریوں اور ہلاکتوں پرتشویش کا اظہار کیا گیا ہے۔ آزادی اظہار رائے اور اجتماع کی آزادی پر پابندی کی خلاف ورزی کی تحقیقات کرانے پر زور دیا گیا ہے۔ خط میں کہا گیا ہے کہ سیاسی تناؤ اور تشدد پاکستان میں سیکیورٹی صورتحال کو بگاڑ سکتا ہے۔ امریکی وزیر خارجہ کو خط بھیجنے میں پاک پیک تنظیم نے کردار ادا کیا، پاک پیک نے کچھ عرصہ پہلے لابنگ بھی کی تھی۔
