حالات معمول پر آچکے ہیں، اداروں کی ہوشیاری سے امن بحال ہوا، ایرانی وزیرخارجہ

تہران: ایرانی وزیر خارجہ عباس عراقچی کا کہنا ہے کہ حالیہ بدامنی کے بعد ملک بھر میں حالات معمول پر آچکے ہیں۔ عباس عراقچی نے کہا کہ عوام اور قانون نافذ کرنے والے اداروں کی ہوشیاری کے باعث ملک میں امن بحال ہوا ہے۔ ان کے مطابق ابتدائی طور پر پرامن مظاہروں کو اسرائیل اور امریکہ کی حمایت یافتہ دہشت گرد عناصر نے تشدد اور انتشار کی طرف دھکیلنے کی کوشش کی۔ عباس عراقچی نے یہ بات متحدہ عرب امارات کے نائب وزیراعظم اور وزیر خارجہ شیخ عبداللہ بن زاید النہیان سے ٹیلیفونک گفتگو کے دوران کہی۔ انہوں نے کہا کہ عوامی شعور اور سیکیورٹی فورسز کے بروقت اقدامات نے حالات کو قابو میں رکھا۔ ایرانی وزیر خارجہ نے بعض امریکی حکام کے بیانات کو اشتعال انگیز اور ایران کے اندرونی معاملات میں کھلی مداخلت قرار دیا۔ ان کا کہنا تھا کہ ایرانی قوم اپنی خودمختاری اور قومی سلامتی کے دفاع کے لیے پرعزم ہے اور کسی بھی بیرونی مداخلت یا جارحیت کو قبول نہیں کرے گی.