شادی کی تقریب پر حملے میں امریکا کے ملوث ہونے کا امکان

لندن : نیوز ایجنسی رائیٹر نے ایران میں شادی کی تقریب پر میزائل حملے میں امریکا کے ملوث ہونے کا امکان ظاہر کردیا۔ امریکا نے کہا ہےکہ واقعہ کی تحقیقات شروع کردی ہیں۔رائٹرز کے تجزیے میں انکشاف ہوا ہے کہ جنوبی ایران کے شہر کوہستک میں شادی کی تقریب کو نشانہ بنانے والا میزائل امریکی تھا۔ رائٹرز نے حملے کی تصاویر اور ویڈیوز کا جائزہ لینے کے لیے اسلحہ کے ماہرین سے بھی رائے لی۔ چار میں سے تین ماہرین نے کہا کہ ہلاکتیں کسی ایرانی میزائل کے بھٹکنے کے نتیجے میں ہونے کا امکان کم ہے۔ ماہرین کے مطابق شواہد براہِ راست امریکی ہتھیار کے حملے سے مطابقت رکھتے ہیں۔ امریکی نائب صدر جےڈی وینس نےکہا کہ حملے کی تحقیقات جاری ہیں، تاہم انہیں ابھی تک یہ معلوم نہیں کہ ذمہ داری امریکی افواج پر عائد ہوتی ہے یا نہیں۔ انہوں نے کہا کہ جنگ کے دوران بعض اوقات ایسے واقعات پیش آ جاتے ہیں۔ امریکا جان بوجھ کر شہریوں کو نشانہ نہیں بناتا۔ وینس نے کہا کہ اگر امریکی فوج سے غلطی ہوتی ہے تو اس کی تحقیقات کی جاتی ہیں تاکہ مستقبل میں ایسی غلطیوں سے بچا جا سکے۔