Raza Musani 
میونخ : سعودی وزیر خارجہ شہزادہ فیصل بن فرحان نے کہا ہے کہ عرب دنیا میں اتفاق رائے پیدا ہو رہا ہے کہ شام کو تنہا کرنے کی پالیسی ناکام ہوگئی ہے۔ میونخ سیکیورٹی فورم سے خطاب میں سعودی وزیرخارجہ نے کہا کہ عرب دنیا میں نیا اتفاق رائے پیدا ہورہا ہے کہ شام کو تنہا کرنے کی پالیسی پر نظرثانی کی ضرورت ہے۔ اور کم سے کم پناہ گزینوں کی واپسی سمیت انسانی مسائل کو حل کرنے کے لیے دمشق کے ساتھ بات چیت ناگزیر ہے۔ نہ صرف خلیج تعاون کونسل میں بلکہ عرب دنیا میں بھی اس بات پراتفاق رائے بڑھ رہا ہے کہ جوں کی توں صورت حال قابل عمل نہیں ہے۔ انہوں نے کہاکہ دمشق میں حکومت کے ساتھ کسی نہ کسی مرحلے پر بات چیت کرنا ہوگی جس سے کم سےکم اہم ترین مقاصد حاصل ہوں، خاص طور پر انسانی نقطہ نظر، پناہ گزینوں کی واپسی وغیرہ کے حوالے سے کچھ پیش رفت ہو۔ اس سے پہلے انہوں نے کہا تھا کہ ریاض کے واشنگٹن کے ساتھ بعض امور میں اختلافات ہیں جو پوشیدہ نہیں ہیں۔ خطے میں سلامتی اور استحکام کے لیے امریکا کے ساتھ مل کر کام کر رہے ہیں۔
