امدادی مرکز پر بھوکے پیاسے فلسطینیوں پر فائرنگ سے شہدا کی تعداد 32 ہو گئی

غزہ: صیہونی فوجیوں نے آج ایک بار پھر امدادی مرکز پرجمع بھوکے پیاسے متاثرین پر براہ راست گولیاں برسادیں۔ فائرنگ سے بتیس فلسطینی شہید اور ستر سے زائد زخمی ہوگئے۔ صیہونی فوجیوں نے رفح میں امداد کے حصول کیلئے موجود متاثرین کو بھاری ہتھیاروں سے نشانہ بنایا۔ فائرنگ سے زخمی کئی فلسطینیوں کی حالت تشویشناک ہے۔
صیہونی فوج نے خان یونس میں مکان پر ڈرون سے حملہ کرکے خواتین اور بچوں سمیت بارہ فلسطینی شہید کردئے۔ اس سے پہلے جنگی طیاروں نے غزہ سٹی میں خیمہ بستی پر بمباری کی جس کے نتیجے میں سات فلسطینی شہید اور درجنوں زخمی ہو گئے۔جبالیہ میں ایک مکان پر حملے میں خواتین اور بچوں سے نو فلسطینی شہید ہوگئے۔ المواسی میں بھی بے گھر خاندانوں کے خیموں کو نشانہ بنایا گیا جس کے نتیجے میں تین خواتین اور ایک بچے سمیت پانچ شہری شہید اور 20 سے زائد زخمی ہو گئے۔
خان یونس ۔غزہ سٹی اور جبالیہ میں بھی حملے کرکے کئی فلسطینی شہید کردئے۔ چوبیس گھنٹوں میں شہدا کی تعداد سو تک جاپہنچی ہے۔