اسرائیلی فوج نے ایک بار پھر غزہ کو خون میں نہلادیا، فضائی بمباری میں 12 فلسطینی شہید، متعدد زخمی

غزہ: صیہونی فوج نے ایک بار پھر غزہ کو خون میں نہلادیا۔ فضائی حملے میں بارہ فلسطینی شہید اور کئی زخمی ہوگئے۔ اسرائیلی طیاروں کی بمباری سے غزہ۔ رفاہ اور خان یونس کے علاقے لرز اٹھے۔ اسرائیلی طیاروں نے دونوں شہروں میں رہائشی عمارتوں پر حملہ کیا۔ اسرائیل کی صیہونی فوج نے دعویٰ کیا ہےکہ حملے میں اسلامی جہاد کے رہنماء، ان کے فوجی کمپاؤنڈ اور ہتھیاروں کی تیاری کے مقامات سمیت دس اہداف کو نشانہ بنایا گیا۔حملے میں 40 طیاروں اور ڈرونز نے حصہ لیا۔ اسلامی جہاد نے اپنے تین کمانڈروں جہاد الغنام، خلیل البہتینی، طارق عزالدین اور ان کے بیوی اور بچوں کے مارے جانے کی تصدیق کی ہے۔ خلیل بہیتینی اسلامی جہاد کے سینئر ترین کمانڈر تھے۔ فضائی حملوں کے بعد صیہونی وزیر دفاع نے جنوبی اسرائیل میں خصوصی حالت نافذ کرتے ہوئے غزہ کی اسرائیل سے جڑی سرحد بند کردی ہے۔ جوابی کارروائی کے پیش نظر اسرائیل نے اپنے جنوبی علاقے کے شہریوں کو بم شیلٹرز میں رہنے کا مشورہ دیا ہے اور علاقے میں اسکول بند رکھنے کا اعلان کیا گیا ہے۔