Raza Musani 
لاہور : بھارتی حکومت نے پاکستان کے ساتھ معاملات طے کرنے کے بعد امدادی گندم براستہ واہگہ بارڈر افغانستان بھجوا دی۔ انڈیا سے 2500 ٹن کی امدادی گندم کے 50 ٹرک گذشتہ روز پاکستان کی سرحد میں داخل ہوئے جو طورخم سرحد کے راستے واپس افغانستان جائیں گے۔ انڈیا میں تعینات افغان سفیر فرید ماموند زئی نے ٹویٹ میں انڈین حکومت کا شکریہ ادا کیا کہ انہوں نے ایسے موقع پر فراخ دلی کا ثبوت دیا جب دو کروڑ سے زیادہ افغان عوام کو بحران کا سامنا ہے۔
گذشتہ ہفتے پاکستانی عہدیداروں نے کہا تھا کہ انڈیا کو براستہ واہگہ افغانستان گندم ترسیل کی اجازت دی جائے گی جہاں لاکھوں کی تعداد میں افراد کو خوراک کی شدید کمی کا سامنا ہے۔پاکستان کی وزارت خارجہ کے ایک عہدیدار نے بتایا تھا کہ انڈیا کے ساتھ ہونے والے معاہدے کے تحت افغانستان سے ٹرک اٹاری واہگہ کے راستے انڈیا میں داخل ہوں گے جہاں سے وہ گندم لے کر واپس روانہ ہوں اور طورخم سرحد سے افغانستان جائیں گے۔
