Raza Musani 
اسلام آباد: حکومت نے سابق وزیراعظم عمران خان کی مذاکرات کی پیشکش کو مسترد کردیا۔وزیر دفاع خواجہ آصف نے کہا ہے کہ نو مئی کو جو ہوا ایسا کوئی پاکستانی سوچ بھی نہیں سکتا۔ عمران خان اتنا آگے جاچکے ہیں کہ اس سے کوئی مذاکرات نہیں ہوسکتے۔ خواجہ آصف نے کہا کہ آج لوگ اس کو چھوڑ کر جارہے ہیں کیوں کہ وہ اس کی غلطیوں کا بوجھ نہیں اٹھا پارہے۔ انہوں نے کہا اسے مزید لوگ چھوڑیں گے، جو مذاکراتی ٹیم بنائی ہے اس میں بھی یہ مزید نام شامل کردیں تاکہ اگر یہ لوگ بھی چھوڑ گئے تو ان کا متبادل تو ہو۔ وزیرداخلہ رانا ثنا اللہ نے کہا کہ عمران خان اب کہتے ہیں کہ ان سے مذاکرات کریں۔ آپ کے ساتھ کیا مذاکرات کیے جائیں؟ آپ نے تو نو مئی کے واقعات کی مذمت تک نہیں کی۔ وزیر ریلوے خواجہ سعد رفیق نےکہا ہے کہ بات کرنے کا ماحول اور ایجنڈا ہوتا ہے لیکن مذاکرات کا یہ ماحول نہیں ہے۔ عمران خان نے جو کمیٹی بنائی اس سے کوئی مذاکرات نہیں کرے گا۔
