شادی ہال میں آگ انتہائی غفلت کی وجہ سے لگی، عراقی حکومت

بغداد: عراقی حکومت نے شادی کی تقریب میں آگ لگنے کو انتہائی غفلت اور حفاظتی اقدامات کی کمی کا نتیجہ قرار دیا ہے۔ عراق کے شہر نینوا کے پر ہجوم شادی ہال میں آگ لگنے سے 113 افراد ہلاک اور کئی زخمی ہوگئے تھے۔ وزیر داخلہ عبدالامیر الشمری نے نیوز کانفرنس میں بتایا کہ واقعہ کی تحقیقات مکمل ہوگئی ہیں جس کے مطابق آگ حادثاتی اور غیر ارادی تھی اور یہ انتہائی لاپرواہی کی وجہ سے لگی۔ انہوں نے کہا کہ آگ پکڑنے والے سجاوٹی سامان نے آگ کو تیزی سے پھیلنے میں مدد ملی اور شادی ہال کو آگ کے گولے میں تبدیل کردیا۔ وزیر داخلہ نےکہا کہ شادی ہال میں 400 افراد کی گنجائش تھی لیکن ہال کے مالک اور عملے نے 900 لوگوں کو پنڈال میں جانے کی اجازت دے دی۔ وزیرداخلہ نے کہا کہ آگ نے شادی ہال کے اندر لوگوں کو پھنسا دیا اور امدادی ٹیموں کو ان تک پہنچنے کے لیے جدوجہد کرنا پڑی کیونکہ باہر نکلنے کے دروازے کم اور چھوٹے تھے۔