Raza Musani 
تہران: ولی امر مسلمین آیت اللہ سید مجتبیٰ حسینی خامنہ ای نے بدعنوانی کے خلاف فیصلہ کن کارروائی کرنے اور امریکا و اسرائیل کی مبینہ جارحیت سے ہونے والے نقصانات کے ازالے کے لیے قومی حقوق اور معاوضے کے حصول کی کوششیں تیز کرنے پر زور دیا ہے۔ عدلیہ کے سربراہ غلام حسین محسنی سے ملاقات کے دوران آیت اللہ مجتبیٰ خامنہ ای نے کہا کہ عدلیہ کو انصاف کے فروغ، عوامی حقوق کے تحفظ، بدعنوانی کے خلاف مؤثر کارروائی اور بدعنوانی کو جنم دینے والی رکاوٹوں کے خاتمے کے ذریعے اسلامی نظام کے لیے عوامی اعتماد اور سماجی حمایت کو مضبوط بنانا چاہیے۔ انہوں نے مقدمات کو تیزی، درستگی اور فیصلہ کن انداز میں نمٹانے کی ضرورت پر بھی زور دیا۔ انہوں نے عدالتی نظام میں جامع اور ٹھوس اصلاحات لانے، اہم شعبوں میں جدید ٹیکنالوجی سے زیادہ سے زیادہ استفادہ کرنے، بالخصوص قوانین پر درست عمل درآمد کی نگرانی بہتر بنانے اور سرکاری اداروں کی کارکردگی میں بہتری کے لیے باقاعدہ معائنے کرنے کی ہدایت کی۔ انہوں نے سرکاری فرائض کی انجام دہی میں کوتاہی کے ان معاملات پر بھی توجہ دینے کی ضرورت پر زور دیا جو جرائم کا سبب بنتے ہیں۔ ان کا کہنا تھا کہ جرائم کے خلاف فیصلہ کن کارروائی کی جائے اور متعلقہ اداروں کے ساتھ مل کر خلاف ورزیوں کے لیے سازگار حالات ختم کیے جائیں۔
