ایران پر حملہ ہوا تو انٹرنیٹ اور مواصلاتی نظام کی لائنیں تباہ کردیں گے، رحیم صفوی

تہران : ولی امر مسلمین کے عسکری امور کے مشیر رحیم صفوی نے کہا ہے کہ ایران، امریکا اور اسرائیل کی جانب سے نئے حملوں کے لیے تیار ہے۔ اس بار جواباً ہم انٹرنیٹ اور مواصلاتی نظام کی لائنیں تباہ کردیں گے۔ ہم ان مرکزی سرورز اور ڈیٹا سینٹرز کو تباہ کریں گے جو امریکی فوج کی خدمات انجام دیتے ہیں اور عالمی معیشت کے لیے تزویراتی اہمیت رکھتے ہیں۔ انہوں نے کہا کہ ایرانی جوہری تنصیبات پر حملوں کے جواب میں ہم دشمن کی جوہری تنصیبات کو نشانہ بنائیں گے۔ اگر ایرانی قیادت کی جان لینے کی کوشش کی گئی تو ہم امریکا میں سیاسی اہداف کو بھی نشانہ بنائیں گے۔ رحجم صفوی نے کہا کہ ایران صورتِ حال کو مزید کشیدہ کرنے کے لیے متعدد اقدامات کرے گا، ایسے اقدامات جو اس نے پہلے کبھی نہیں کیے۔ ہم نے کبھی کھوکھلی دھمکیاں نہیں دیں اور نہ ہی اب ایسا کرنے کا ارادہ رکھتے ہیں۔ انہوں نے کہا کہ اگر اسرائیل یہ سمجھتا ہے کہ ہمیں قتل کرکے وہ اپنے تمام مسائل حل کر سکتا ہے تو وہ سخت غلط فہمی میں مبتلا ہے۔ ہم شہید ہو جائیں گے، لیکن فوج اپنا مشن پورا کرے گی۔ ہم ہر طرح کی صورتِ حال کا سامنا کرنے کے لیے تیار ہیں۔