Raza Musani 
دوحہ : امریکی صدر ڈونلڈ ٹرمپ کے خصوصی نمائندے ٹام بیرک نے کہا ہےکہ خلیجی ممالک اپنی سلامتی کے لیے اب مکمل طور پر امریکا پر انحصار نہیں کرسکتے، دوحہ میں گلوبل سکیورٹی فورم سے خطاب کرتے ہوئے انہوں نے کہا کہ امریکا مشرقِ وسطیٰ سے دستبردار نہیں ہورہا، تاہم خطے میں اپنے کردار کا ازسرِنو تعین کررہا ہے۔ بیرک کے مطابق دوسری جنگِ عظیم کے بعد قائم ہونے والا وہ نظام، جس کے تحت امریکا مشرقِ وسطیٰ کو سکیورٹی فراہم کرتا تھا اور اس کے بدلے توانائی کے وسائل تک رسائی حاصل کرتا تھا، اب تبدیل ہورہا ہے۔
انہوں نے کہا کہ مشرقِ وسطیٰ کے ممالک بھی اس حقیقت کو تسلیم کررہے ہیں کہ وہ اپنے تمام مسائل کے حل کے لیے امریکا پر انحصار نہیں کرسکتے۔ ان کے بقول، علاقائی ممالک کو اپنی سلامتی یقینی بنانے کے لیے شراکت داریوں اور دفاعی اتحادوں کو مضبوط بنانا ہوگا۔ ٹام بیرک نے امریکا کی ماضی کی فوجی مداخلتوں پر بھی سوال اٹھائے اور کہا کہ خطے میں حکومتوں کو تبدیل کرنے کی کوششیں اکثر غلط ثابت ہوئیں۔ ان کے مطابق امریکا اب براہِ راست کنٹرول کے بجائے علاقائی ممالک کو اپنی سلامتی کے انتظام میں مدد دینے کی سمت بڑھ رہا ہے۔
