نئی جنگ کے اثرات تباہ کن ہوں گے، خطے کا جغرافیہ تبدیل ہو جائے گا، جنرل محبی

تہران : پاسدارانِ انقلاب کے ترجمان بریگیڈیئر جنرل حسین محبی نے خبردار کیا ہے کہ امریکا اور اسرائیل کے ساتھ ممکنہ تباہ کن جنگ کے اثرات صرف ایران تک محدود نہیں رہیں گے بلکہ پورے خطے کے مستقبل کا تعین کر سکتے ہیں۔ ان کا کہنا ہے کہ ایرانی قوم کو قومی اتحاد برقرار رکھتے ہوئے اپنی خودمختاری، ثقافت اور قومی و مذہبی شناخت کا دفاع کرنا ہوگا۔ جنرل حسین محبی نے کہا ہے کہ امریکا اور اسرائیل کے ساتھ جاری محاذ آرائی محض فوجی تنازع نہیں بلکہ ایران کی قومی شناخت، ثقافت، مذہب اور تہذیب کے تحفظ کی جنگ بھی ہے۔اپنے بیان میں حسین محبی نے کہا کہ ایرانی معاشرے کو موجودہ حالات کی سنگینی کا ادراک کرتے ہوئے قومی یکجہتی برقرار رکھنی چاہیے اور اپنے مستقبل کا فیصلہ ملکی صلاحیتوں پر انحصار کرتے ہوئے کرنا چاہیے۔
پاسدارانِ انقلاب کے ترجمان نے اس اعتماد کا اظہار کیا کہ ایران اس جنگ میں مکمل فتح حاصل کرکے عالمی طاقت کے طور پر ابھرے گا۔ انہوں نے خبردار کیا کہ امریکا اور اسرائیل ایران کی شناخت کو کمزور کرنے، اس کی ثقافت مٹانے اور اپنی اقدار مسلط کرنے کے ذریعے ملک کو کمزور اور تقسیم کرنا چاہتے ہیں۔ حسین محبی نے کہا کہ ایرانی سرزمین کی سالمیت، قومی و مذہبی شناخت اور تہذیب کا تحفظ ایرانی قوم کی اہم ترین ذمہ داریوں میں شامل ہے۔ ان کے مطابق، عوام کا ثابت قدم رہنا اور مزاحمت جاری رکھنا ایران کو موجودہ بحران سے نکلنے اور باوقار و مضبوط مستقبل کی تعمیر میں مدد دے سکتا ہے۔