Raza Musani 
ابوظہبی: متحدہ عرب امارات نے امریکا کی زیر قیادت خلیجی سمندری اتحاد کے ساتھ کام روک دیا۔ یو اے ای کی وزارت خارجہ نے ایک بیان میں اس اقدام کی کوئی وجہ بتائے بغیر کہا کہ متحدہ عرب امارات نے دو ماہ قبل اڑتیس ملکی کمبائنڈ میری ٹائم فورسز میں اپنی شرکت واپس لے لی ہے۔ امریکا کی زیر قیادت خلیجی سمندری اتحاد بحری جہازوں کی حفاظت کرتا ہے۔ امریکی میڈیا کے مطابق اماراتی بحری جہازوں کو تحفظ فراہم نہ کرنے پر امارات نے امریکا سے اظہار ناراضی کیا تھا۔ امارات کی وزارت خارجہ نے ایک بیان میں کہا کہ یہ فیصلہ تمام شراکت داروں کے ساتھ موثر سیکیورٹی تعاون کے بارے میں جائزے کے نتائج کی روشنی میں کیا گیا۔ متحدہ عرب امارات نے یہ بھی کہا کہ وہ علاقائی سلامتی اور استحکام کو آگے بڑھانے کے ساتھ ساتھ بین الاقوامی قانون کے مطابق اپنے ساحلوں کے قریب نیوی گیشن کی حفاظت کو یقینی بنانے کے لیے بات چیت اور سفارتی مشغولیت کے لیے پرعزم ہے۔
