Raza Musani 
نیویارک : امریکا کے سوا سلامتی کونسل کے تمام ارکان نے صومالی لینڈ کو تسلیم کرنے کی شدید مذمت کرتے ہوئے خبردار کیا ہے کہ اسرائیلی فیصلے کے غزہ میں فلسطینیوں پر بھی سنگین اثرات مرتب ہو سکتے ہیں۔ سلامتی کونسل کے پندرہ میں سے چودہ ارکان نے اسرائیلی فیصلے کی مذمت کی۔ اقوامِ متحدہ میں صومالیہ کے سفیر ابو بکر ظاہرعثمان نے کہا کہ یہ فیصلہ نہ صرف صومالیہ کی وحدت کو خطرے میں ڈالتا ہے بلکہ ہارن آف افریقہ اور بحیرۂ احمر کے استحکام کے لیے بھی نقصان دہ ہے۔ عرب لیگ کے نمائندے ماجد عبدالفتاح عبدالعزیز نے خبردار کیا کہ اس فیصلے کو فلسطینی عوام کی جبری بے دخلی یا شمالی صومالی بندرگاہوں کو فوجی اڈوں کے لیے استعمال کرنے سے جوڑا جا رہا ہے۔
امریکی نائب مندوب ٹیمی بروس نے مؤقف اختیار کیا کہ اسرائیل کو دیگر خودمختار ریاستوں کی طرح سفارتی تعلقات قائم کرنے کا حق حاصل ہے۔ تاہم صومالی لینڈ کو تسلیم کرنے میں امریکا نے اسرائیل کی پیروی سے گریز کیا۔
