وفاقی حکومت کا خیبرپختونخوا میں دہشت گردی کے خاتمے کیلئے بھرپور مدد کا فیصلہ

اسلام آباد: وفاقی حکومت نے خیبرپختونخوا میں بدامنی اور دہشت گردی کے بڑھتے ہوئے واقعات کے خاتمے کے لیے صوبے کی مدد کرنے کا فیصلہ کرلیا۔وفاقی وزیرداخلہ رانا ثناءاللہ کی زیر صدارت امن وامان کےمتعلق اسٹیرنگ کمیٹی کا اجلاس ہوا، جس میں خیبرپختونخواہ بالخصوص سوات میں حالیہ دشت گردی واقعات کا تفصیلی جائزہ لیا گیا۔ کمیٹی نے اتفاق کیا کہ کے پی میں انتہا پسندی و دہشت گردی فروغ پارہی ہے صوبے میں دہشت گردی کے خاتمے کیلئے بھرپور کردار ادا کیا جائے گا اور امن و عامہ کو یقینی بنانے کے لیے ہر ممکن اقدامات کیے جائیں گے۔ اجلاس میں دہشت گردی واقعات کے مکمل کنٹرول کے حوالے سے مخلتف تجاویز پر تبادلہ خیال کیا گیا۔ اجلاس میں تحریک طالبان پاکستان سے مذاکرات کا معاملہ بھی زیرغور آیا۔ اراکین نے خیبر پختونخواہ میں دہشت گردی کے بڑھتے ہوئے واقعات پر تشویش کا اظہار کرتے ہوئے سوات کے عوام کے ساتھ اظہارِ یکجہتی کیا۔ اجلاس میں فیصلہ کیا گیا کہ وفاقی حکومت خیبرپختونخوا میں دہشت گردی کے خاتمے کے لیے بھرپور مدد کرے گی۔