کشیدگی کے نتائج صرف مشرقِ وسطیٰ تک محدود نہیں رہیں گے، انتونیو گوتریس

نیویارک : اقوامِ متحدہ کے سیکریٹری جنرل انتونیو گوتریس نے خبردار کیا ہے کہ مشرقِ وسطیٰ گہرے بحران کی طرف بڑھ رہا ہے۔ خطے میں بڑھتی کشیدگی کے اثرات دنیا بھر میں محسوس کیے جا سکتے ہیں۔ سماجی رابطے کی ویب سائٹ ایکس پر اپنے بیان میں انتونیو گوتریس نے کہا کہ مشرقِ وسطیٰ میں صورتحال مسلسل خراب ہو رہی ہے اور حالیہ دنوں میں حملوں میں اضافہ دیکھنے میں آیا ہے۔ انہوں نے کہا کہ موجودہ جنگ بندی عملی طور پر مکمل امن کے بجائے صرف محدود شدت کی لڑائی میں تبدیل ہو چکی ہے۔ اقوامِ متحدہ کے سربراہ نے خبردار کیا کہ اس محدود جنگ کے مکمل اور وسیع تصادم میں تبدیل ہونے کے خطرات کو کم نہیں سمجھنا چاہیے۔ ان کا کہنا تھا کہ خطے میں جاری کشیدگی کے نتائج صرف مشرقِ وسطیٰ تک محدود نہیں رہیں گے بلکہ عالمی سطح پر بھی اثرات مرتب ہوں گے۔ گوتریس نے تمام فریقوں پر زور دیا کہ وہ کشیدگی میں مزید اضافے سے گریز کریں اور تنازعات کے حل کے لیے سفارتی راستہ اختیار کریں۔