Raza Musani 
نابلس : صیہونی فورسز نے مقبوضہ مغربی کنارے کے شہر نابلس میں درندگی کا مظاہرہ کرتے ہوئے 6 فلسطینی شہید اور 21 زخمی کردئے جس میں سے 3 کی حالت تشویشناک ہے۔ صیہونی فورسز نے پرانے شہر نابلس کے ساتھ ساتھ رام اللہ کے شمال میں واقع قصبے کے متعدد محلوں پر حملہ کیا۔ قابض فوج نے پرانے شہر کے علاقے ہوش العطوت میں متعدد نوجوانوں کو گھیرے میں لے لیا۔ جس کے بعد مسلح تصادم شروع ہو گیا۔ قابض افواج کو ڈرون کی مدد بھی حاصل تھی۔ شہدا میں مزاحمتی گروپ لائنز ڈین کا رہنما 31 سالہ ودیح الحوث بھی شامل ہیں۔ حماس کے سیاسی بیورو کے رکن زہر جبرین نے فلسطینیوں کی شہادت پر اظہار افسوس کرتے ہوئے مزاحمتی گروپ لائنز ڈین گروپ کے جنگجوؤں کی تعریف کی جو بہادری سے قابض افواج کے حملوں کا مقابلہ کرتے ہیں۔ انہوں نے کہا کہ ہم اپنے لوگوں اور مزاحمتی جنگجوؤں سے مطالبہ کرتے ہیں کہ وہ قبضے کے خلاف کھڑے ہو جائیں اور اس کا مقابلہ کریں۔
