امریکا میں خوفناک آگ نے بستیاں اجاڑ دیں، 11 افراد ہلاک، 150 ارب ڈالر کا نقصان

لاس اینجلس : غزہ میں فلسطینیوں کی نسل کشی میں شریک جرم امریکا میں خوفناک آگ نے بستیاں اجاڑ دیں۔ متاثرہ علاقے ایٹمی حملے کے بعد کا منظر پیش کرنے لگے۔ امریکی ریاست کیلی فورنیا کے شہر لاس اینجلس میں لگی آگ نے ہزاروں ایکڑ اراضی پر درخت، گھر اور گاڑیوں سمیت ہر شے کو پھونک ڈالا۔ دس ہزار سے زائد مکان اور عمارتیں راکھ کا ڈھیر بن گئیں۔
پیسیفک پےلی سیڈس کا علاقہ بری طرح تباہ ہوگیا ہے یہ وہ علاقہ ہے جہاں ہالی وڈ کے ارب پتی افراد کے گھر ہیں۔
آگ کے باعث 12 ہزار سے زائد عمارتیں تباہ ہوچکی ہیں اور 2 لاکھ سے زائد افراد کو نقل مکانی کرنا پڑی ہے۔
آگ سے 11 افراد ہلاک اور درجنوں زخمی ہوچکے ہیں، جب کہ ہلاکتوں میں اضافے کا خدشہ ہے۔ آگ نے 37,000 ایکٹر سے زائد رقبے کو تباہ کر دیا ہے اور تیز ہوائیں اس کے مزید پھیلنے کا سبب بن سکتی ہیں۔
آتشزدگی سے ہونے والے نقصانات کا تخمینہ 150 بلین ڈالر لگایا گیا ہے۔
آگ کو بجھانے کیلئے ہزاروں فائر فائٹرز دن رات مصروف ہیں۔ ستر میل فی گھنٹہ کی رفتار سے چلنے والی خشک ہواؤں نے فائر فائٹرز کی کوششیں ناکام بنادیں۔