شام کے صدر کا دورہ ایران، سپریم لیڈر، صدر اور دیگر حکام سے ملاقاتیں

تہران : شام کے صدر بشار الاسد نے اعلیٰ وفد کے ہمراہ تہران کا دورہ کیا جہاں انھوں نے صدر سید ابراہیم رئیسی اور دیگر حکام سے ملاقاتیں کیں۔ بشار اسد نے اس ملاقات میں شامی حکومت اور عوام کی حمایت پر ایرانی حکومت اور عوام کا شکریہ ادا کرتے ہوئے کہا کہ شام ایران کے ساتھ تمام شعبوں میں تعلقات کو فروغ دینے کا خواہاں ہے۔ ابراہیم رئیسی نے کہا کہ خطے کے مستقبل کا تعین مذاکرات کی میز پر نہیں بلکہ علاقائی قوموں کی مزاحمت اور استقامت پر مبنی ہوگا۔صدر رئیسی نے شام اور ایران کے شہداء خاص طور پر شہید سلیمانی کو خراج عقیدت پیش کرتے ہوئے کہا کہ اسلامی مزاحمتی شہداء نے عالمی دہشت گردی کا مقابلہ کرنے میں اہم کردار ادا کیا اور آپ بھی اپنے والد کی طرح مزاحمتی محاذ کی اہم شخصیت ہیں۔ایرانی صدر نے خطے کے سیاسی اور سیکیورٹی حالات کی طرف اشارہ کرتے ہوئے کہا کہ مزاحمتی مجاہدین نے ثابت کردیا ہے کہ وہ خطے کی ناقابل انکار طاقت ہیں اور وہ شام اور خطے میں امن و صلح برقرار کرنے میں اپنا اہم کردار ادا کرسکتے ہیں۔