Raza Musani 
ٹورنٹو: کینیڈین وزیراعظم جسٹن ٹروڈو نے کہا ہے کہ سکھ رہنما ہردیپ سنگھ نجر کے قتل کی تحقیقات صرف تین ہندوستانیوں تک محدود نہیں ہے۔ ٹورنٹو میں سکھ ورثہ و ثقافت کی تقریب میں گفتگو کرتے ہوئے ٹروڈو نے کہا کہ کینیڈا قانون کی حکمرانی والا ملک ہے جس میں مضبوط اور آزاد نظامِ انصاف ہے اور ہماری حکومت اپنے شہریوں کے تحفظ کا عزم رکھتی ہے۔ ٹروڈو کا کہنا تھا کہ نجر کے قتل کے کیس میں گرفتار ملزمان سے تفتیش جاری ہے، اس کے ساتھ ساتھ ایک اور انکوائری بھی جاری ہے جو صرف گرفتار تین افراد تک محدود نہیں۔ انہوں نے کہا کہ کینیڈا کی سکھ کمیونٹی کے بہت سے لوگ نجر کے قتل کے بعد خود کو غیر محفوظ محسوس کر رہے ہیں تاہم ہر کینیڈین شہری کو ملک میں امتیازی سلوک اور تشدد کی دھمکیوں سے محفوظ اور آزاد رہنے کا بنیادی حق حاصل ہے۔۔ ہندوستان اور کینیڈا کے تعلقات گزشتہ سال ستمبر میں شدید تناؤ کا شکار ہو گئے تھے کیونکہ ٹروڈو نے خالصتانی رہنما کے قتل میں ہندوستانی ایجنٹوں کے ملوث ہونے کا الزام لگایا تھا۔
