احتجاج میں تشدد کی شفاف تحقیقات کرکے حقائق سامنے لائے جائیں، شیعہ علما کونسل

اسلام آباد: شیعہ علماء کونسل پاکستان کے قائد علامہ ساجد علی نقوی نے اسلام آباد میں تنظیم کی مجلسِ عاملہ کے ہنگامی اجلاس سے خطاب کرتے ہوئے کہا ہے کہ ایران اور اسرائیل کے درمیان بڑھتی ہوئی کشیدگی کے تناظر میں پاکستان کا مصالحانہ اور امن پسندانہ کردار انتہائی اہم اور خوش آئند ہے۔ علامہ ساجد نقوی نے زور دیا کہ موجودہ صورتحال میں باہمی محاذ آرائی کے بجائے اجتماعی سوچ اپنانے کی ضرورت ہے تاکہ خطے کو کسی بڑی تباہی سے بچایا جا سکے۔ انہوں نے پاکستان کی جانب سے کشیدگی کم کرنے کی کوششوں کو سراہا۔ اجلاس کے اعلامیے میں فلسطینی عوام کی جدوجہدِ آزادی کی مکمل حمایت کا اعادہ کیا گیا اور کہا گیا کہ القدس کی آزادی مظلوموں کی فتح ثابت ہوگی۔ انہوں نے پاکستان میں حالیہ احتجاجی مظاہروں کے دوران ہونے والے پرتشدد واقعات پر تشویش کا اظہار کرتے ہوئے ان واقعات کی آزادانہ اور شفاف تحقیقات کا مطالبہ کیا، تاکہ حقائق عوام کے سامنے آسکیں۔
علامہ ساجد نقوی نے عالمِ اسلام کے درمیان اتحاد اور یگانگت کی ضرورت پر زور دیا اور کہا کہ مسلم ممالک کو اپنے مسائل مذاکرات اور سفارتی ذرائع سے حل کرنے چاہئیں۔ اجلاس کے اختتام پر پاکستان کی سلامتی، استحکام اور اتحادِ امت کے لیے خصوصی دعا کی گئی۔ اس موقع پر علامہ عارف حسین واحدی، علامہ شبیر حسن میثمی اور دیگر مرکزی و صوبائی رہنما بھی موجود تھے۔