ترکیہ اور شام میں شدید زلزلہ، سینکڑوں افراد ہلاک و زخمی

انقرہ : ترکیہ اور شام سمیت خطے میں شدید زلزلے سے سینکڑوں افراد ہلاک اور زخمی ہوگئے۔ زلزلے کا مرکز ترکیہ کے مشرقی صوبے غازیان ٹیپ سے 20 کلومیٹر دور قصبے پزاک میں 17 کلومیٹر گہرائی میں تھا۔ زلزلے کی شدت 7.9 ریکارڈ کی گئی زلزلے نے دونوں ممالک میں متعدد عمارتوں کو ملبے کا ڈھیر بنادیا۔ سینکڑوں افراد ملبے تلے دب گئے۔ ریسکیو ٹیموں اور شہریوں نے اپنی مدد آپ کےتحت درجنوں لاشوں اور زخمیوں کو ملبےسے نکالا، مزید ہلاکتوں کا خدشہ ظاہر کیا جارہا ہے۔ متاثرہ علاقوں میں امدادی کارروائیاں جاری ہیں۔ سڑکیں تباہ ہونے سے امدادی ٹیمیوں کو متاثرہ علاقوں تک پہنچنے میں مشکلات کا سامنا ہے۔زلزلے کے بعد شدید آفٹر شاکس کا سلسلہ جاری ہے۔11 منٹ بعد آنے والے آفٹرشاک کی شدت 6٫6 ریکارڈ کی گئی۔ زلزلے کے جھٹکے قبرص، یونان، اردن، لبنان اور مقبوضہ بیت المقدس میں بھی محسوس کئے گئے۔