قطری وزیر اعظم اور طالبان سربراہ میں خفیہ مذاکرات

کابل : قطری وزیر اعظم محمد بن عبدالرحمن الثانی اور طالبان سربراہ ہیبت اللہ اخونزادہ کے درمیان خفیہ مذاکرات کا انکشاف ہوا ہے۔ قطری وزیراعظم نے بارہ مئی کو دورہ افغانستان کے موقع پر قندھار میں طالبان سپریم لیڈر سے ملاقات کی۔ کسی غیر ملکی رہنما کے ساتھ طالبان سپریم لیڈر کی یہ پہلی ملاقات ہے۔ جسے عالمی برادری کے ساتھ تناؤ کو حل کرنے کی کوششوں کا حصہ قرار دیا جارہا ہے۔ رپورٹ کے مطابق یہ ملاقات افغان حکمرانوں کی جانب سے اپنی تنہائی کو ختم کرنے کے طریقوں پر بات کرنے کے لیے نئی آمادگی کا اشارہ ہے۔ اس ملاقات کی امریکی انتظامیہ کو بریفنگ دی گئی۔ امریکی انتظامیہ طالبان سے مذاکرات کو آگے بڑھانے سمیت تمام امور پر ہم آہنگی پیدا کرنے کی کوشش کررہی ہے۔ قطری وزیراعظم نے ہیبت اللہ کے ساتھ لڑکیوں کی تعلیم اور خواتین کی ملازمت پر پابندی کو ختم کرنے سمیت تمام امور کو اٹھایا۔ رائٹر کے مطابق وائٹ ہاؤس نے مذاکرات پر تبصرہ کرنے سے انکار کر دیا ہے۔ جبکہ طالبان نے بھی فوری طور پر تبصرہ کی درخواست کا جواب نہیں دیا۔