Raza Musani 
جدہ : سعودی جنگی طیاروں نے جنوبی یمن کے صوبہ حضرموت میں عرب امارات کی حمایت یافتہ جنوبی عبوری کونسل کے ٹھکانوں پر فضائی حملے کیے۔ جس میں سات علیحدگی پسند ہلاک اور بیس سے زائد زخمی ہوئے۔ سعودی اتحاد نے حضرموت کے شہر سیئون میں ہوائی اڈے اور ایک فوجی اڈے کو نشانہ بنایا ہے۔
یمن کی وزارتِ اطلاعات کے نائب وزیر محمد قیزان کے مطابق یہ حملے اس وقت کیے گئےجب یمنی سرکاری افواج حضرموت میں فوجی ٹھکانوں کا کنٹرول سنبھال رہی تھیں۔ حضرموت میں ہوم لینڈ شیلڈ فورسز نے فوجی مراکز اور تنصیبات پر کنٹرول حاصل کرنے کے لیے اپنی پیش قدمی جاری رکھی ہوئی ہے۔
سعودی وزارتِ خارجہ نے جنوبی یمن کے دھڑوں کو ’مسئلہ جنوب کے منصفانہ حل پر بات چیت‘ کے لیے ریاض میں مذاکرات کی دعوت دی ہے۔ وزارت خارجہ کے بیان میں کہا گیا ہے کہ سعودی دارالحکومت میں اس کانفرنس کی درخواست یمنی صدارتی قیادت کونسل کے صدر رشاد العلیمی نے کی تھی۔ سعودیہ نے تمام دھڑوں پر زور دیا ہے کہ وہ ایک جامع وژن تیار کرنے کے لیے اس میں شرکت کریں جو جنوبی عوام کی امنگوں کو پورا کر سکے۔
