Raza Musani 
تہران : ولی امر مسلمین آيت اللہ سید علی خامنہ ای نے کہا ہے کہ امریکی پابندیوں کے شکار ممالک ایک دوسرے سے تعاون اور اتحاد قائم کرکے پابندی کے ہتھکنڈے کو ناکام بنا دیں، اور ہمارا ماننا ہے کہ یہ کام ممکن ہے۔ بیلاروس کے صدر الیگزینڈر لوکاشنکوو سے ملاقات میں ولی امر مسلمین نے انقلاب کی کامیابی کے فوری بعد ایران کے خلاف امریکی پابندیوں اورگذشتہ 12 برسوں میں لگائی گئی سخت ترین پابندیوں کی طرف اشارہ کرتے ہوئے کہا کہ سخت پابندیوں نے ایران کو اپنی داخلی توانائيوں اور صلاحیتوں کی طرف متوجہ کرایا اور پابندیوں کے اس عرصے میں ترقی و پیشرفت کے بہت سے اسباب فراہم ہوئے اور ایران سائنس اور ٹیکنالوجی، میڈیکل اور بیالوجی، ایرواسپیس، نیوکلیائی اور نینو سمیت مختلف میدانوں میں حیرت انگیز پیشرفت کرنے میں کامیاب رہا۔ انہوں نے کہاکہ اگر امریکی پابندیوں کے شکار ممالک ایک دوسرے کی صلاحیتوں سے پوری طرح استفادہ کریں تو تمام فریقوں کے لیے اس کے بے حساب فوائد ہوں گے۔ انھوں نے سائنس اور ٹیکنالوجی، تجارت اور عالمی اداروں میں سیاسی سرگرمیوں سمیت ایران اور بیلاروس کے درمیان تعاون کے میدانوں کا ذکر کرتے ہوئے شمال جنوب کوریڈور کے پروجیکٹ کی طرف بھی اشارہ کیا اور کہا کہ یہ کوریڈور دونوں ملکوں اور اسی طرح روس اور خطے کے مفاد میں ہے اور فریقین کو اسے عملی جامہ پہنانے کی کوشش کرنی چاہیے۔ انہوں نے ایران اور بیلاروس کے درمیان پائے جانے والے بہت سارے مشترکات کی طرف اشارہ کرتے ہوئے کہا کہ امریکا اور بعض یورپی ملکوں کی غنڈہ گردی والی پابندیاں ان ہی مشترکات میں سے ایک ہیں۔
