Raza Musani 
جنیوا : انٹرنیشنل کمیٹی آف ریڈ کراس نے خبردار کیا ہے کہ غزہ کے ملبے تلے دبے ہزاروں فلسطینیوں کی لاشوں کی شناخت ممکن نہ رہنے کا خدشہ بڑھتا جا رہا ہے۔ ادارے کے مطابق ریسکیو کارروائیوں میں تاخیر صورتحال کو مزید سنگین بنا رہی ہے۔ غیر ملکی خبر رساں ادارے کے مطابق انٹرنیشنل کمیٹی آف ریڈ کراس نے کہا ہے کہ غزہ میں جنگ کے بعد تباہ شدہ عمارتوں کے ملبے تلے دبے ہزاروں فلسطینیوں کی شناخت اب شدید خطرے سے دوچار ہے۔ تنظیم کے مطابق اگر لاشیں طویل عرصے تک ملبے میں دبی رہیں تو ان کی شناخت کرنا تقریباً ناممکن ہو سکتا ہے۔ ریڈ کراس کے ترجمان پیٹ گرفتھز نے کہا کہ وقت گزرنے کے ساتھ انسانی باقیات تیزی سے تحلیل یا ناقابل شناخت حالت میں تبدیل ہو سکتی ہیں۔ انہوں نے مزید کہا کہ ملبہ ہٹانے اور لاشوں کی تلاش کے لیے درکار بھاری مشینری غزہ میں داخل نہیں کی جا رہی جس سے ریسکیو عمل سست ہے۔ غزہ کے صحت حکام کے مطابق اندازاً دس سے چودہ ہزار افراد اب بھی ملبے تلے دبے ہوئے ہیں۔ ریسکیو ٹیمیں محدود وسائل کے ساتھ دستی آلات اور ہاتھوں سے ملبہ ہٹا کر تلاش میں مصروف ہیں۔ ریڈ کراس نے خبردار کیا ہے کہ مسلسل تاخیر سے متاثرہ خاندانوں کو اپنے پیاروں کی شناخت کا حق بھی متاثر ہو سکتا ہے۔
