غزہ میں بارش اور آندھی، خیمے اکھڑ گئے، خستہ عمارتیں گرگئیں، خاتون شہید

غزہ : غزہ میں طوفانی بارش اور تیز ہواؤں نے درجنوں خیمے اکھاڑ دئے اور خستہ عمارتیں اور دیواریں گرادیں۔ جس سے ایک خاتون شہید اور کئی افراد زخمی ہوگئے۔ بارش کے پانی نے نشیبی علاقوں میں قائم بے شمار خیموں کو ڈبو دیا۔ جسکے باعث بچوں سمیت کئی خاندان شدید سرد موسم میں کھلے آسمان تلے نکلنے پر مجبور ہو گئے۔ چند گھنٹوں کی بارش میں خیمے اور عارضی پناہ گاہیں زیرِ آب آ گئیں۔
خیموں میں بچا کھچا سامان برباد ہوگیا۔ بارش کے نئے سلسلے نے انسانی بحران کو مزید سنگین بنا دیا ہے۔ الرمال محلہ میں دیوار گرنے سے ایک فلسطینی نوجوان خاتون شہید ہو گئی۔ جبکہ دیگر علاقوں میں کئی افراد زخمی ہوئے۔ محفوظ پناہ گاہوں کی عدم دستیابی بے گھر فلسطینیوں کی مشکلات کو مزید سنگین بنا رہی ہے۔