جاسوسی کا الزام، پولینڈ نے روس کے 45 سفارت کار ملک بدر کردئے

وارسا : پولینڈ نے روس کے لیے جاسوسی کرنے کے الزام میں 45 سفارت کاروں کو ملک بدر کردیا۔ پولینڈ کے وزیر داخلہ مارئیس کامنسک نے میڈیا کو بتایا کہ سفارت کاروں کے بھیس میں 45 روسی جاسوسوں کو ملک بدر کردیا اور اپنے ملک میں روس کے اسپیشل سروسز نیٹ ورک کو ختم کر رہے ہیں۔قبل ازیں پولینڈ کے انٹیلی جنس ادارے کے ترجمان نے میڈیا کو بتایا تھا کہ روس کے 45 سفارت کاروں نے سفارتی سرگرمیوں کی آڑ میں پولینڈ کی جاسوسی کی جس کے مکمل شواہد موجود ہیں۔ وزارت خارجہ کو آگاہ کردیا گیا ہے۔ترجمان کا مزید کہنا تھا کہ روسی سیکرٹ سروس کے لیے جاسوسی کرنے کے شبے میں ایک پولش شہری کو بھی حراست میں لیا گیا ہے جو وارسا رجسٹری آفس کے آرکائیوز میں کام کرتا تھا۔