سانحہ پشاور: خودکش حملہ آور افغان مہاجر تھا, منصوبہ بندی افغانستان میں ہوئی، پولیس

پشاور : خیبرپختونخوا پولیس نے کہا ہے کہ پشاور کی مسجد میں خودکش حملہ کرنے والا دہشت گرد افغان پناہ گزین تھا جو حملے کی تربیت لینے واپس افغانستان چلا گیا تھا، حملے کی منصوبہ بندی بھی افغانستان میں کی گئی پولیس کے دو سینئر حکام نے غیر ملکی خبررساں ادارے کو کہا کہ خودکش حملے کی تیاری افغانستان میں ہوئی۔ حکام نے بتایا کہ حملہ آور افغان شہری تھا جس کی عمر 30 برس سے زائد تھی اور وہ کئی دہائیوں قبل اپنے خاندان کیساتھ پاکستان منتقل ہوگیا تھا۔ پولیس حکام نے بتایا کہ خودکش بمبار افغانستان گیا جہاں اس نے تربیت حاصل کی اور اپنے اہلخانہ کو بتائے بغیر واپس آگیا۔ انہوں نے بتایا کہ داعش خراسان ہمارے لئے بڑا خطرہ بن رہی ہے، یہ لوگ افغانستان سے آپریٹ ہورہے ہیں تاہم پاکستان میں ان کے سلیپر سیلز موجود ہیں۔ طالبان نے اس حوالے سے فوری طور پر رد عمل دینے سے گریز کیا ہے۔