فلسطینی ریاست کے بغیر خطے میں امن ممکن نہیں، روسی ترجمان

ماسکو : روسی وزارتِ خارجہ کی ترجمان ماریا زخاروف کا کہنا ہے کہ آزاد ریاستِ فلسطین کے قیام کے بغیر مشرقِ وسطیٰ میں دیرپا امن ممکن نہیں۔ ماسکو میں بریفنگ کے دوران زخاروف نے کہا کہ دو سال سے جاری اسرائیلی حملوں میں ہزاروں فلسطینی شہریوں کی جانیں ضائع ہو چکی ہیں، جبکہ مغربی کنارے میں کشیدگی مزید بڑھ رہی ہے۔ یہ حقائق واضح کرتے ہیں کہ فلسطینی مسئلے کا حل مشرقِ وسطیٰ میں امن اور استحکام کی بنیادی شرط ہے۔ انہوں نے کہاکہ بحران کا حل صرف سیاسی اور سفارتی راستوں سے ممکن ہے، جو اقوامِ متحدہ کی منظور شدہ قراردادوں پر مبنی ہوں۔ زخاروف نے زور دیا کہ ایک آزاد، خودمختار اور جغرافیائی طور پر منسلک ریاستِ فلسطین کا قیام، جو اسرائیل کے ساتھ محفوظ اور پُرامن بقائے باہمی کے اصول پر قائم ہو، خطے میں پائیدار امن کے لیے ناگزیر ہے۔ انہوں نے کہا کہ اس کے بغیر مشرقِ وسطیٰ میں دیرینہ امن کے امکانات پیدا نہیں ہو سکتے۔