فلسطینی طویل اسرائیلی قبضے میں جہنم میں زندگی گزار رہے ہیں، اقوام متحدہ

دوحہ : اقوام متحدہ کے سیکریٹری جنرل انتونیو گوتیرس نے کہا ہے کہ فلسطینی اسرائیلی حکومت کے طویل قبضے کے تحت مصائب اور جہنم میں زندگی بسر کر رہے ہیں۔الجزیرہ کو انٹرویو میں انتونیو گوتیرس نے کہا کہ وہ حوارہ قصبے کی صورت حال پر گہری تشویش میں مبتلا ہیں۔ آبادکاروں نے حملہ کرکے درجنوں مکانات اور کاروں کو آگ لگادی۔ حملے میں سینکڑوں فلسطینی زخمی ہوچکے ہیں انہوں نے زور دے کر کہا کہ فلسطینی عوام اس وقت بہت زیادہ مصائب کا شکار ہیں اور اسرائیلی محاصرہ شدہ غزہ میں کئی پہلوؤں سے زندگی جہنم بنی ہوئی ہے۔ گوتیرس نے اس دعویٰ کی بھی تردید کی کہ ان کی تنظیم نے یوکرین کے مقابلے میں فلسطینی مسئلے پر دُہرا معیار اپنا رکھا ہے۔ انہوں نے کہا کہ دہائیوں سے جاری اسرائیل فلسطین تنازع کے دو ریاستی حل کا کوئی متبادل نہیں ہے۔انہوں نے مزید کہا کہ بین الاقوامی برادری کو عالمی قوانین کا احترام یقینی بنانے کے لیے مضبوطی سے پیش قدمی کرنی چاہیے۔ تاہم انھوں نے تسلیم کیا کہ بین الاقوامی برادری اقوام متحدہ کی قراردادوں پر عمل درآمد کرنے کے قابل نہیں ہے۔یہ قراردادیں بین الاقوامی گورننس میں اصلاحات کی ضرورت کو اجاگر کرتی ہیں۔