Raza Musani 
رام اللہ : فلسطینی صدر محمود عباس نے فلسطینیوں کیخلاف جارحیت کے خاتمے تک اسرائیل کی اقوام متحدہ کی رکنیت معطل کرنے کا مطالبہ کردیا۔ اقوام متحدہ میں نکبہ کی یادگاری تقریب سے خطاب میں محمود عباس نے انتہائی جذباتی خطاب کیا۔ محمود عباس نے کہا کہ جنرل اسمبلی، سلامتی کونسل اور انسانی حقوق کونسل میں اسرائیل کیخلاف ہزار سے زیادہ قراردادیں منظور ہوئیں لیکن آج تک ایک قرارداد پر بھی عمل درآمد نہیں ہوا۔ انہوں نے عالمی برداری سے استفسار کیا کہ اسرائیلی اور فلسطینی ریاستوں کے قیام اور فلسطینی پناہ گزینوں کی واپسی کی اقوام متحدہ کی قراردادوں پر عمل درآمد کیوں نہیں ہوا؟ انہوں نے اقوام متحدہ پر زور دیا ہے کہ اسرائیل کی رکنیت اس وقت تک معطل کرے جب تک وہ فلسطینیوں کے خلاف جارحیت ختم نہیں کرتا۔ محمود عباس نے کہا کہ ہم باضابطہ طور پر بین الاقوامی قانون اور بین الاقوامی قراردادوں کے مطابق مطالبہ کرتے ہیں کہ اسرائیل ان قراردادوں کا احترام کرے یا اقوام متحدہ اس کی رکنیت معطل کردے۔
