پاکستانی حکام عوام کے پُرامن احتجاج کے حق کا احترام کریں، ایمنسٹی انٹرنیشنل

لندن : ایمنسٹی انٹرنیشنل کا کہنا ہے کہ جیل میں قید سابق پاکستانی وزیراعظم عمران خان سے ملاقات نہ کرانے پر احتجاج کرنیوالوں پر بار بار ہائی پریشر واٹر کینن کا استعمال پُرامن اجتماع کے آئینی حق کی صریح خلاف ورزی ہے۔
ایمنسٹی انٹرنیشنل کا کہنا ہے کہ پاکستانی حکام کو عوام کے پُرامن احتجاج کے حق کا احترام کرنا چاہیے اور طاقت کے غیر متناسب اور سزا دینے کے طریقوں کو ختم کرنا چاہیے۔ ایمنسٹی کے مطابق منگل کی شب راولپنڈی کی اڈیالہ جیل کے باہر عمران خان سے عدالتی حکم کے باوجود ملاقاتوں سے بار بار انکار کے خلاف دیے گئے پُرامن دھرنے کو ایک مرتبہ پھر واٹر کینن کے ذریعے منتشر کر دیا گیا۔ مظاہرین کا الزام ہے کہ شدید سردی میں استعمال کیے گئے پانی میں کیمیائی مواد بھی شامل تھا۔ ایمنسٹی انٹرنیشنل نے بیان میں کہا کہ خاندان اور وکلاسے ملاقات روکنا پاکستان کی بین الاقوامی انسانی حقوق کے وعدوں کی خلاف ورزی ہے اور منڈیلا رولز کے مطابق اسے کوئی تعزیری اقدام نہیں بنایا جا سکتا۔ ایمنسٹی نے کہا ہے کہ حراست کے حالات بین الاقوامی انسانی حقوق کے معیار کے مطابق ہونے چاہئیں۔ فوری طور پر عمران خان کے خاندان اور وکیل سے ملاقات کے حقوق بحال کئے جائیں۔