Raza Musani 
کراچی: کراچی میں ملی تنظیموں اور دینی شخصیات نے اربعین حسینی کے خلاف سازش کو ناکام بنادیا۔ اور عزاداری پر کسی قسم کا سمجھوتہ نہ کرنے کا اعلان کیا۔ جعفریہ الائنس پاکستان کی دعوت پر ملت جعفریہ کی ملی جماعتوں کا مشترکہ اجلاس بارگاہ حسینی میں منعقد ہوا۔ جس میں بشمول مجلس وحدت مسلمین، شیعہ علما کونسل، آئی ایس او، پاک محرم ایسوسی ایشن، مرکزی تنظیم عزا،ٹرسٹیز، پرمٹ ہولڈرز، اسکاؤٹس گروپ اور شہر بھر سے ملی شخصیات نے شرکت کی۔ شرکائے اجلاس نے متفقہ اعلامیہ جاری کرتے ہوئے کہا کہ اربعین امام حسین (ع) مذہبی جوش و خروش اور عقیدت و احترام کے ساتھ بپا کیا جائے گا۔ کسی بھی قسم کے بیرونی دباؤ اور اندرونی سازش کو قبول نہیں کیا جائے گا ۔ عزاداری ہماری شہ رگ حیات ہے جس پر کسی قسم کا سمجھوتہ ناقابل قبول ہے۔ شرکائے اجلاس نے پاک محرم ایسوسی ایشن، اسکاؤٹس گروپس اور جلوس کے منتظمین پر اپنے بھرپور اعتماد کا اظہار کیا۔ اجلاس کے شرکاء نے متفقہ طور پر فیصلہ کیا کہ ماضی کی طرح جلوس اربعین کا اہتمام کیا جائے گا اور نشتر پارک میں مجلس عزاء مقررہ وقت پر منعقد کی جائے گی جس سے علامہ شہنشاہ نقوی خطاب کریں گے اور اسکاؤٹس گروپس جلوس عزاء کی قیادت کریں گے اور نماز دوران مرکزی جلوس کا اہتمام آئی ایس او کے زیر اہتمام ایم اے جناح روڈ پر امام بارگاہ علی رضا ع کے قریب کیا جائے گا۔انتظامیہ اور قانون نافذ کرنے والے ادارے عزاداروں کی فُول پروف سیکیورٹی کے انتظامات کو یقینی بنائیں۔ شرکائے اجلاس نے سانحہ عاشورا، سانحہ اربعین، ٹارگٹ کلنگ اور مختلف دہشت گردانہ کاروائیوں میں شہید ہونے والے عزاداروں کے قاتلوں کی گرفتاری کا مطالبہ کیا۔ شرکائے اجلاس نے شیعہ لاپتہ عزاداروں اور ان کے اہل خانہ سے بھرپور یکجہتی کا اظہار کرتے ہوئے کہا کہ پوری شیعہ قوم لا پتہ شیعہ عزاداروں اور ان کے اہل خانہ کے ساتھ ہیں۔
