آئی ایس او کے تحت جامعہ وفاقی اردو میں یوم حسین(ع) کا انعقاد

کراچی(پ-ر) امامیہ اسٹوڈنٹس آرگنائزیشن جامعہ وفاقی اردو یونٹ کے تحت وفاقی اردو یونیورسٹی گلشن کیمپس کراچی میں سالانہ یوم حسین علیہ السلام بعنوان قیام امام حسین ع اور نظام اسلامی منعقد کیا گیا۔ جس سے آیت اللہ غلام عباس رئیسی، مولانا منظر الحق تھانوی، مولانا علی نقی ہاشمی سمیت ملک پاکستان کے نامور علماء کرام نے خطاب کیا جبکہ مختلف نوحہ و نعت خواں حضرات نے بارگاہ امامت،میں نذرانہ عقیدت پیش کیا۔ یوم حسین ع میں طلبہ و طالبات سمیت اساتذہ کی کثیر تعداد نے شرکت کی۔ یوم حسین سے خطاب کرتے ہوئے آیت اللہ غلام عباس رئیسی کا کہنا تھا کہ امام حسین ع کی بے مثال قربانی کا مقصد دین محمد صلی اللہ علیہ و آلہ وسلم کی بقاء اور اسلام کی سربلندی تھا۔آپ علیہ السلام نے اپنے قیام کو اپنی ایک وصیت میں یوں بیان کیا تھا کہ میرے قیام کا اصل مقصد فتنہ و فساد برپا کرنا نہیں بلکہ اپنے نانا حضرت محمد مصطفی ص کی امت کی اصلاح کرنا ہے اور اس کا واحد طریقہ امر باالمعروف و نہی عن المنکر ہے،انہوں نے اپنے خطاب میں مزید کہا کہ آج پھر یزید وقت نے اپنا سر اٹھایا ہے اس نے پھر مسلمانان عالم پر ظلم و بربریت کا بازار گرم کیا ہوا ہے۔ یوم حسین ع سے خطاب کرتے ہوئے مولانا منظر الحق تھانوی نے کہا کہ امام حسین ع کی جانب سے راہ اسلام میں دی جانے والی عظیم قربانی ہمیشہ یاد رکھی جائے گی اور یہ قربانی تا قیامت دنیا کے مظلومین کے لیے باعث تقویت رہے گی۔
مقررین نے دو روز قبل جامعہ وفاقی اردو یونیورسٹی میں شرپسند عناصر کی جانب سے سبیل امام حسین ع پر بزدلانہ حملے کی مزمت کرتے ہوئے کہا کہ چودہ سو سال سے یہ ہی امام ع کا پاکیزہ خون انسانیت کو نجات دلاتا آیا ہے، ہر دور میں جب بھی کسی ظالم و جابر انسان نے مقدسات دین کو پامال کرنے یا معصومین پر ظلم توڑنے کے لئے سر ا ٹھانے کی کوشش کی تو حسینیت نے اس کا سر کچل دیا۔