Raza Musani 
تل ابیب : اسرائیلی حکومت نے عالمی برادری کی تشویش مسترد کرتے ہوئے نئی صیہونی بستی کی تعمیر کیلئے ٹینڈر جاری کردئے۔ اسرائیل کی لینڈ اتھارٹی نے اپنی ویب سائٹ پر مقبوضہ مغربی کنارے میں 1,248 نئے ہاؤسنگ یونٹس کیلئے ٹینڈر شائع کیے ہیں۔ یہ ٹینڈر امریکا کو چار ماہ تک ہاؤسنگ یونٹس کی تعمیر روکنے کی یقین دہانی کے باوجود شائع کئے گئے۔ فلسطینی وزارت خارجہ اور تارکین وطن نے نئی آبادکاری کیلئے ٹینڈر جاری کرنےکی شدید مذمت کی ہے۔ ایک بیان میں کہا گیا ہے کہ اسرائیل بین الاقوامی موقف۔ مطالبات۔دستخط شدہ معاہدوں اور اقوام متحدہ کی قراردادوں کو پامال کررہا ہے جو آبادکاری کو غیر قانونی، ناجائز اور ایک ایسا جرم قرار دیتی ہیں جس سے اقوام متحدہ کی قراردادوں کے مطابق دو ریاستی حل کے اصولوں کی نفی ہوتی ہے۔ فلسطینی وزارت نے اپنے بیان میں مزید کہا کہ بستیوں میں اضافے اور توسیع عالمی برادری کی مرضی کےلئے کھلا چیلنج ہے اوریہ امریکی اور بین الاقوامی پوزیشنوں کو مسترد کرنے کے مترادف ہےجو تنازعات پر خطرات سے خبردار کرتے ہیں۔ بیان میں کہا گیا ہے کہ قابض ریاست اپنے توسیع پسندانہ نوآبادیاتی منصوبوں کو عملی جامہ پہنانے اور مقبوضہ مغربی کنارے کے بتدریج الحاق کی پیشرفت کے لیے دوہرے بین الاقوامی معیارات کا فائدہ اٹھا رہی ہے۔
