عمان کی آبنائے ہرمز کے انتظام کے لیے مشترکہ علاقائی مکینزم کی تجویز

تہران : عمان نے ایران کو آبنائے ہرمز کے انتظام کے لیے ایک مشترکہ علاقائی مکینزم کی تجویز پیش کی ہے جس کے تحت رضاکارانہ فیس وصول کی جائے گی۔ ایرانی وزیر خارجہ عباس عراقچی نے آبنائے ہرمز کی صورتحال پر سعودی عرب اور عمان کے وزرائے خارجہ سے الگ الگ ٹیلی فونک رابطے کیے ہیں۔
خبر رساں ادارے رائٹرز کے مطابق خلیجی ذرائع نے بتایا کہ عمان کی جانب سے پیش کی گئی اس تجویز کو خطے کے ممالک کی حمایت حاصل ہے۔ ذرائع کے مطابق عمانی تجویز کے تحت ایران اس اہم آبی گزرگاہ پر اکیلے کنٹرول حاصل نہیں کرے گا۔ رپورٹ کے مطابق یہ تجویز آبنائے ملاکا کے ماڈل پر مبنی ہے جہاں اس آبی راستے کو استعمال کرنے والے ممالک اور ادارے رضاکارانہ طور پر فیس ادا کرتے ہیں۔ جس سے جہاز رانی، ماحولیاتی تحفظ اور ریسکیو کارروائیوں کے اخراجات پورے کیے جاتے ہیں۔