Raza Musani 
اوڈیشہ : اوڈیشہ میں ٹرین حادثے کے بعد ریسکیو آپریشن مکمل کرلیا گیا۔ 294 افراد کی ہلاکت کی تصدیق کی گئی ہے۔اوڈیشہ کے ضلع بالاسور میں حادثے کے بعد 294 لاشیں مختلف اسپتالوں میں منتقل کی گئیں۔ جبکہ 1175 افراد کو اسپتالوں میں منتقل کیا گیا۔ بیشتر کی چھٹی کردی گئی 382 زیر علاج ہیں۔ ریسکیو آپریشن مکمل کرنے کے بعد پٹریوں کی مرمت کا کام زور و شور سے جاری ہے۔ مرکزی وزیر ریلوے اشونی ویشنو نے حادثہ کے مقام پر رات بھر جاری مرمت کے کام کا جائزہ لیا۔ اس دوران ہزار سے زیادہ مزدور رات بھر ملبہ ہٹانے میں مصروف رہے۔ حادثے کے بعد سو سے زائد ٹرینیں منسوخ کردی گئیں جبکہ پچاس سے زائد کا رخ تبدیل کردیا گیا۔ وزیر اعظم نریندر مودی نے گزشتہ روز جائے حادثہ کا معائنہ کیا اور اسپتال میں زخمیوں کی عیادت کی۔ وزیر اعظم نے کہا کہ یہ واقعہ انتہائی سنگین ہے۔ اس معاملے میں مجرموں کو بخشا نہیں جائے گا۔ حکومت زخمیوں کی مدد سے پیچھے نہیں ہٹے گی۔
