Raza Musani 
نئی دہلی: ہندوستان کے صوبے اوڈیشہ میں ٹرینوں کے درمیان خوفناک تصادم میں تین سو کے قریب افراد ہلاک اور نو سو سے زائد زخمی ہوگئے۔ حادثہ جمعہ کی شام سات بجے اوڈیشہ کے ضلع بالاسور میں بہناگا اسٹیشن کے قریب پیش آیا۔ شالیمار چنئی کورومنڈیل ایکسپریس کی کئی بوگیاں پٹری سے اتر گئیں۔ اس دوران بنگلورو ہاؤڑا سپرفاسٹ ایکسپریس بھی اس سے جاٹکرائی۔ تیسری مال گاڑی بھی حادثے کی لپیٹ میں آئی۔ خوفناک حادثے سے کہرام مچ گیا۔ ریسکیو ٹیموں نے موقع پر پہنچ کر لاشوں اور زخمیوں کو قریبی شہروں کے اسپتالوں میں منتقل کیا۔ جہاں تمام اسپتالوں میں ایمرجنسی نافذ کردی گئی ہے۔ کئی زخمیوں کی حالت تشویشناک ہے جس سے ہلاکتوں میں اضافے کا خدشہ ہے، اسے حالیہ برسوں کا مہلک ترین حادثہ قرار دیا جا رہا ہے۔ وزیر اعلیٰ نوین پٹنائک نے ایک روزہ سرکاری سوگ کا اعلان کیا ہے۔ وزیر ریلوے نے حادثے کی اعلیٰ سطحی تحقیقات کا حکم دے دیا ہے۔
