Raza Musani 
تل ابیب : اسرائیلی وزیرِ اعظم نیتن یاہو نے کہا ہے کہ انھوں نے جنوبی لبنان میں موجود اُس سیکورٹی زون کو مزید وسعت دینے کا حکم دیا ہے جسے وہ موجودہ حفاظتی علاقہ قرار دیتے ہیں۔اسرائیلی فوج کی شمالی کمان کے ہیڈکوارٹر کے دورے کے دوران نیتن یاہو کا کہنا تھا کہ اس اقدام کا مقصد حزب اللہ کی جانب سے دراندازی کے خطرے کو مکمل طور پر روکنا اور اینٹی ٹینک میزائلوں کی فائرنگ کو سرحد سے دور دھکیلنا ہے۔ ایک ویڈیو بیان میں نیتن یاہو نے کہا کہ لبنان میں فوجی آپریشنز جاری رہیں گے اور اسرائیلی افواج اپنے مقاصد کے حصول تک پوری طاقت کے ساتھ کارروائیاں کرتی رہیں گی۔ یہ بیان ایسے وقت سامنے آیا ہے جب خطے میں کشیدگی مسلسل بڑھ رہی ہے اور اسرائیل کی جانب سے مختلف محاذوں پر فوجی سرگرمیاں تیز ہو چکی ہیں۔
