Raza Musani 
جدہ: اسلامی تعاون تنظیم اور عرب گروپ نے اسرائیل کے توسیع پسندانہ منصوبوں کی شدید مذمت کرتے ہوئے عالمی برادری سے مطالبہ کیا کہ آبادکاری، جبری بے دخلی اور الحاق کی کوششوں کو فوری طور پر روکا جائے۔
اقوام متحدہ میں ترکیہ کی نائب مستقل مندوب اصلی گوون نے اسلامی تعاون تنظیم کی جانب سے خطاب کرتے ہوئے کہا کہ مقبوضہ فلسطینی علاقوں میں اسرائیلی آبادکاری کے پھیلاؤ، فلسطینیوں کی جبری بے دخلی اور دیگر غیرقانونی اقدامات کو روکنے کے لیے فوری اور مؤثر اقدامات کیے جائیں۔ اصلی گوون کا کہنا تھا کہ اسرائیل کی موجودہ پالیسیاں بین الاقوامی قانون اور اقوام متحدہ کی قراردادوں کی صریح خلاف ورزی ہیں اور ان سے خطے میں امن و استحکام کو شدید خطرات لاحق ہیں۔
دوسری جانب اقوام متحدہ میں سعودی عرب کے مستقل مندوب عبدالعزیز الواصل نے عرب گروپ کی نمائندگی کرتے ہوئے اسرائیل کے ای ون منصوبے کو فلسطینی ریاست کے مستقبل کے لیے وجودی خطرہ قرار دیا۔ انہوں نے زور دیا کہ بین الاقوامی قانون کے مطابق جوابدہی کو یقینی بنایا جائے تاکہ فلسطینی علاقوں میں جاری خلاف ورزیوں کا مؤثر سدباب ممکن ہو سکے۔
